政情：大舊醫完肚 巧遇衞奕信
人民力量立法會議員陳偉業（大舊），尋晚喺金鐘巧遇前港督衞奕信（Lord David Wilson）。難得遇見舊朋友，大舊即刻上前拍照留念，傾番幾句。大舊影完相隨即就將相片放上社交網站。我哋打畀大舊求證，佢顯得好高興，仲連續哈哈笑咗幾聲添。
大舊話尋晚喺金鐘食完飯，一行出嚟就見到個熟口熟面嘅外籍人士，睇真啲，原來係舊朋友衞奕信。兩人即時寒暄上嚟，大舊話只係閒話家常，亦冇問到對方做乜會嚟香港。不過，大家唔使咁奇怪，事關衞弈信有名係中國通，卸任後亦不時來港。照片中所見，今年已經七十七歲嘅衞奕信精神好好，腰板仍然挺直，相信健康唔錯。