政情：李嘉誠捐逾千萬 撐廣東婦女
長實集團主席李嘉誠尋日現身廣州，與廣東省委書記汪洋、省長朱小丹共同啟動「集思公益 幸福廣東」支持婦女計劃項目，為省內婦女及兒童提供多元服務。有關項目資金總額為二千萬元人民幣，李嘉誠基金會出資一千萬元人民幣支持啟動，廣東省政府亦出資一千萬元人民幣，預料資助嘅公益項目不少於一百六十個，直接惠及六十萬婦女，三百萬市民間接受惠。
李嘉誠致詞時慨嘆人心冷漠，佢話有人指現代人嘅心比南極底層嘅水更冷，又話置身喺複雜及困難嘅社會中，充滿強烈嘅無力感。不過，佢相信「上善若水」，只要公道和溫情燃活在每人嘅道德良心之中，人心係可以結合成為力量，就可以建立自覺及健康嘅公民社會。佢又讚揚廣東省取得成就，話貢獻社會係一種福分，希望藉此共同尋找幸福廣東嘅方程式，共建理想家園。
借鏡「香港仁 愛香港」
該項目由廣東省婦女兒童工作委員會負責執行，主要借鏡李嘉誠基金會嘅「香港仁 愛香港」計劃，公開集結各界提交具創意、可實踐嘅慈善項目，經公眾票選後，由該計劃撥款資助。有關項目將於十二月十七日起八個星期，接受第一回合嘅網上申請，經甄別嘅合資格項目上載網站（http://care.gdwomen.org.cn）後，將有兩星期時間讓公眾投票。