政情：嫻姐黃國健面臨搣柴？
經常被視為愛國愛港團體嘅工聯會，近日喺「長者生活津貼計劃」上竟然同政府打對台，兼夾與泛民主派為伍，支持提出中止待續議案，拖延通過撥款，令政府吃下首場敗仗。我哋收到消息，話民建聯（民記）同部分建制派團體，近日不時向有關方面打小報告，投訴工聯會不顧全大局，只顧住自己利益，所以希望喺嚟緊全國人大、政協換屆時，將工聯會部分巨頭「搣柴」，挫一挫佢哋嘅氣燄，據聞其中一個巨頭正正就係工聯會生招牌、榮譽會長陳婉嫻。
有民記中人大呻，作為愛國愛港組織，工聯會近日嘅表現真係過分咗，同時覺得參加超級區議會選舉嘅劉江華之所以會落敗，全因當日去到後期玩棄保時，操盤人選擇保嫻姐棄劉江華，結果嫻姐先可以勝出。點知嫻姐唔識知恩圖報，近日竟然同反對派走埋一齊玩政府，如果有關方面唔做番啲嘢，好難令其他義無反顧支持政府嘅人心服口服，所以踢嫻姐出政協係其中一個最佳嘅懲戒方法。
工聯中人質疑存心抽水
消息人士又分析，之所以揀嫻姐開刀，皆因佢現時喺全國政協所屬界別係中華全國婦女聯合會，並非特邀香港人士，即使最終畀人「搣柴」亦唔會太礙眼喎。就住呢件事，我哋向工聯會中人打探消息，對方講出另一個版本，首先其實嫻姐早就放風唔想做全國政協，呢件事喺工聯會並非秘密，加上工聯會一直打算唔畀立法會議員再兼任內地公職，質疑對方存心抽水咁話。
政協位置有爭拗，全國人大代表又點會風平浪靜吖？工聯會以往曾經有三個港區全國人大位，不過近年已經得番兩個，所以有傳佢哋話要積極爭取攞番三個位，但要求已遭有關方面否決。此外，身為立法會議員嘅黃國健（KK），都有機會要將人大代表個位交畀理事長吳秋北，據聞KK正積極爭取留任，但工聯會內部就唔係咁同意。無論如何，政治存在好大變數，到底嫻姐同KK係咪真係會被搣柴，大家就要留心睇到實喇。