中環出更：民主阿婆獨家村行街
雖然已屆耄耋之年，兼且政治能量已微乎其微，但有「民主阿婆」之稱嘅前政務司司長陳方安生仍然樂此不疲，每逢有重大政治事件發生，都會不甘寂寞出嚟抽水，妄想繼續指點江山。好可惜民主阿婆已「人走茶涼」，以往圍住喺佢身邊團團轉嘅傍友都唔多見到，卓妮前日就發現民主阿婆，一個人孤零零咁喺銅鑼灣利園商場行悶街，期間走咗入一間名店，左睇右睇、左揀右揀，搞完一輪後落寞咁離開。
發現民主阿婆嘅時間，係前日傍晚接近六點鐘，以往備受人們簇擁嘅佢，早已經風光不再，只見佢喺商場內緩緩前行，狀似漫無目的咁款，唔知點樣打發時間好。
頭耷耷離開店舖
民主阿婆行咗一陣，終於走入名店入面，一時睇吓衫裙、一時又睇吓袋，但期間似乎冇乜職員上前推銷，結果搞咗一輪後，民主阿婆始終冇收穫，只好頭耷耷咁離開店舖。
話時話，大前晚貪曾約埋成班「曾朋友」喺中環香港會所食飯，但民主阿婆就話冇佢份，連「哎吔細佬」有飯局都唔預佢，唔怪得要行悶街囉！