中環出更：靚女義賣Cup Cake
造型趣致嘅Cup Cake令人愛不釋手，兩年前創辦Let Them Eat Cake嘅靚女黃彥婷（Sharon），巧手設計嘅蛋糕炙手可熱。香港愛滋病基金會日前就搵咗Sharon合作舉辦「Love Cake慈善行動」，以義賣Cup Cake及工作坊形式為基金籌款。基金會副主席趙曾學韞一到場就急不及待試身手，話咁快整咗件靚靚Cup Cake；而太子珠寶鐘錶執董鄧宣宏雁（Emily）就自掏腰包，揀選多款花花蛋糕送贈朋友。
經常出入大小派對嘅趙太係籌款高手，最近大型籌款活動一個接一個，佢同老公趙善簪共同創辦嘅善學基金啱啱籌完款，嚟緊又要幫伊利沙伯醫院病人資源中心及瑪嘉烈醫院搵資源。佢笑稱，三十年來未停過，坦言幫手籌款比捐錢做善事更難。基金會主席梁智鴻都有到場，佢話全球現有三千幾萬名愛滋病人，每十二秒鐘就有一人感染，每十八秒就有一人死亡，奈何至今仍未有良藥醫治，惟有加強預防教育。
《希望滿載》鼓勵病友
今次以時下流行嘅Cup Cake藝術宣揚呢個訊息，夠晒緊貼潮流。不過，Sharon話要將咁抽象嘅訊息具體化，都幾考工夫。佢同義工們通力合作炮製幾個大型展品，包括由五百個蛋糕仔砌成嘅巨型紅絲帶畫作，仲有一個名為《希望滿載》嘅作品，以滿瀉嘅Cup Cake寓意愛滋病人應時刻懷抱希望。Sharon原本喺英國做室內設計師，砌蛋糕又點會難得倒佢呢？
卓妮