成日都話香港同新加坡係競爭對手，如果係咁，理論上彼此互有輸贏先至啱數。情況就好比西班牙足球勁旅巴塞同皇馬，梗係有時巴塞贏，有時皇馬勝o架啦，咁先至係真正嘅競爭對手吖嘛。
偏偏香港同新加坡呢一對所謂競爭對手，餐餐都係人哋贏，香港次次技不如人，點解咁搞鬼嘅呢？就好似世界銀行發表嘅全球營商環境競爭力報告咁吖，新加坡連續第七年高踞首位，香港屈居其後做老二。世銀嘅報告話呀，新加坡加速改革，令公司更快及高透明度展開生意。排名第三嘅係新西蘭，緊隨其後依次係美國、丹麥、挪威同英國。
喂，人哋新加坡嘅競爭力係冧莊七連冠，換言之香港輸足七年啦，一次都未贏過喎。如果巴塞或者皇馬連續七年攞唔到聯賽冠軍，十個教練都唔夠炒魷魚啦。
除咗競爭力冠絕全球，新加坡其他方面更加係拋離香港。滙豐銀行今年五至七月喺一百個國家訪問超過五千名旅居當地嘅外國人，新加坡嘅經濟吸引力排榜首，香港第四，中國第七。
睇到呢度，大家係咪覺得二奶命嘅香港岌岌可危？冇錯嘞，人無遠慮必有近憂，今年就話競爭力排名第二啫，明年有可能拾級而下，事關世銀嘅報告指出，○五年至今營商環境改善得最顯著嘅五十個經濟體之中，三分一來自撒哈拉以南嘅非洲地區，波蘭營商環境改善得最勁。競爭力呢家嘢，即使你唔退步都冇用，畢竟人哋會進步，隨時從後趕上都唔奇。
嗱，大家唔好以為功夫茶杞人憂天，再睇多一項調查吖。號稱全球第二大嘅招聘及人力資源公司Randstad，冇耐之前發表報告。該公司訪問咗五百四十位香港商界領袖以及三百四十位僱員，結果顯示近七成僱主預計知識型人才於未來五年將佔勞動人口最大比例，但只有百分之二十八僱主表示，有信心政府政策同行動能夠造就知識型人才。百分之五十五僱主認為，教育界不能提供市場所需嘅技術同知識。簡單咁講，香港面臨嚴重人才短缺，導致企業競爭力下降。
十年樹木，百年樹人，既然香港面臨嚴重人才短缺，係唔係應該盡快培訓或者輸入人才呀？唉，講起就傷腦筋，特區政府話就話會出錢出力打造教育產業，仲要係優質嗰隻，之不過十畫都未有一撇，吹到天花亂墜嘅私立大學連影都未有。計功夫茶話齋，唔該百日未維新嘅梁朝政府生生性性啦，前特首曾蔭權已經蹉跎咗好多歲月o架喇，人哋或者「輸在起跑線」，香港就好比一隻驕傲嘅兔仔「睡在半路中」，龜兔賽跑遲早輸得一塌糊塗！