CY上台以來，樓價如脫線紙鳶愈升愈高，解決基層居住問題，房屋政策已成當務之急。
「民生無小事」，貧富兩極愈拉愈闊，低下層能夠在市區住劏房，原來已經好幸福，君不見元朗連豬欄同雞寮都改建成劏房，香港嘅居住問題，CY如果唔能夠急市民所急，搞好房屋政策，則香港必定成為國際之恥！
事實上，一些舊區如深水埗、觀塘、北角等，最少仍有十萬人住喺「棺材房」，在樓價、租金不斷上升下，據稱租客已不單是七老八十、既傷且殘嘅老人家，連八、九十年代嘅年輕人也大有人在！難為《經濟學人》仲喺約七十個城市中，評選香港為全球最適宜居住嘅城市！
老朽真係唔知佢哋係攞景還是贈興？聯合國經濟及社會理事會就批評得啱聽：「香港政府在握有充足財政資源下，對籠屋（即今天的棺材房）的不作為是不可容忍的。」
活人瞓棺材房，窮人住豬欄雞寮劏房，香港呢個「東方之珠」嘅背後，晚晚幻彩詠香江，又有乜嘢值得政府及港人驕傲？
望住個維港活活渴死，你都咪話唔諷刺。
政府再唔積極扶貧，連住唔起豬欄雞寮劏房嘅N無人士，只好「以天為被，以地為蓆」，淪為露宿者；有露宿者話齋：「現在這個年代，那些月租超過一千蚊嘅床位竟然還有木蝨，我寧願瞓街。」香港已是個躁暴之城，市民心與身俱不安，香港明天，乜事都可發生，若然風狂雨驟，CY張櫈都唔知擺喺邊！