早前德育及國民教育風波，民主黨前副主席狄志遠曾經開腔力撐國教，隨即被黨內眾人批鬥，前主席何俊仁更對狄志遠表示遺憾同震驚，又強烈譴責，搞到好似十惡不赦咁。事件最終由該黨紀委會跟進，最終紀委覺得狄志遠冇違反黨紀，狄志遠於是覺得被人噴完一臉屁連道歉都冇句，惟有谷住道氣寫信畀黨中央委員會，要求個黨收回譴責言論。點知代主席劉慧卿竟然叫狄志遠有不滿可以搵番何俊仁解釋喎，確係闊佬懶理。
