剛卸任航運交通界議員嘅人大代表劉健儀（Miriam），回港後隨即喺社交網站上載考察圖片，順道同大家報告吓考察成果。Miriam話，今次係首次到雲南，大讚雲南風景一流，物流配置都一流，但交通配套就有待改善喇。佢舉例話，由昆明到麗江如果搭飛機僅須四十分鐘，但如果搭唔到呢班機嘅話，要搭車嘅就要長達六、七個鐘喎，所以建議有關方面加強航班服務。
講開麗江，考察團都有去到麗江古城，Miriam話，麗江古城依家嚴重商業化，佢估計同麗江出咗名有關喎。至於有冇帶手信或戰利品返香港，佢話帶咗啲雲南白藥同咖啡，亦希望將來有時間都同朋友再去雲南玩吓。