政情：黑英自爆畀黃錦星「打低」
唔少人一直擔心黃錦星（KS）做環境局局長做唔嚟，但前天文台長林超英（黑英）就撐佢好有理由做局長。黑英尋日出席電台節目時爆料，話KS積極喺屋企搞節能，可以每人每日只用約一度電，比佢每人每日用兩度電仲要低，「連我都打低埋，梗係有理由做局長！」
黑英話，KS係建築物節能專家，對呢方面好有心，有心到喺屋企搞節能，做到每人每日只係用約一度電，證明KS好有熱誠。佢仲話，如果KS只係當局長係個高官咁做，其實好容易過，求求其其就得嘞，但依家KS咁勤力，就會令自己好難過喇；佢仲講笑話，見KS咁瘦，就知對方勤力啦！
有人話KS對於撤回大埔龍尾灘方案轉咗口風，黑英就天文台台長上身，話口風嘅嘢係「風」嚟嘛，無定向風日日都可以改，所以不作評論。對於龍尾灘單嘢有冇轉機，佢就話天氣好難預測，政治氣候更加難測，要睇政府嚟緊點行先至知，佢話：「好似你問我扯唔扯八號波一樣」，都係言之尚早喎。