政情：dbc重臣喪插煲呔針
已經停播嘅香港數碼廣播有限公司（下稱dbc）返魂乏術，早幾日一班員工仲意志激昂咁佔領政府總部，要求爭取復播，有人仲絕食以示不滿，但唔夠幾日，已有高層同創辦人鄭經翰（煲呔針）劃清界線。本來同煲呔針並肩作戰多年嘅dbc大錢台台長黎則奮（Q仔），尋日就喺社交網站狠批鄭經翰被煲呔針和唐營軍師嘅形象所累，難免令人覺得dbc有隱藏政治任務，仲講明唔會同煲呔針合作搞網台。冰封三尺非一日之寒，Q仔今次爆料，唔知代表咗幾多dbc員工嘅心聲呢？
Q仔係著名政經評論人，亦係煲呔針嘅「文膽」兼dbc開台重臣，佢主持嘅節目《政治經濟學》更係dbc最受歡迎節目之一，而且不時喺網上號召支持者搞運動，可以話係幕後軍師，但估唔到呢位煲呔針左右手忍唔住攤牌，睇嚟Q仔忍咗好耐喇。佢尋日喺社交網站留言，話煲呔針自從失意dbc後，諗住轉戰搞網台，但佢就講明唔再埋煲呔針堆，寧願自己開收費網站，希望有真正嘅言論自由喎。言下之意，咪即係話跟住煲呔針搵食好難暢所欲言囉！
之後Q仔仲話，真正獨立自主就唔准依附任何力量，但鄭經翰一直受到煲呔針和唐營軍師呢兩大形象所拖累，無法取得政黨、社運團體及基層組織信任，所以就算爆出絕密錄音後，仍然有人認為dbc有隱藏政治任務，令電台好難企喺道德高地，唔值得市民全力支持。炮打司令部後，Q仔似乎仲未息憤，喺留言兩小時後再向煲呔針發第二炮，索性講明dbc完全冇復播機會，叫班網民唔使幻想。
斥鄭經翰冇信念 注定冇復播
Q仔坦言，目前唯一辦法係搞個數以十萬嘅群眾運動抗爭，但慨嘆煲呔針份人冇信念，唔同意佢嘅分析判斷，更加唔信群眾力量，所以dbc注定冇得復播。雖然Q仔句句頂住煲呔針，但班網民似乎好撐Q仔，仲話將來Q仔開咪，佢哋一定會畀錢收聽喎。不過，有網民就擔心既然煲呔針唔信群眾，咁主持人樓南光絕食咪好傻？由於Q仔爆大鑊實在太震撼，吸引到位聲稱係「鄭經翰」嘅人留言回覆Q仔，話雖然大家不同想法，但依然支持Q仔，因為仲係一家人喎。