中環出更：孫穎自駕遊歐洲舔舔脷
「琵琶公主」孫穎桃李滿門，經常帶學生出國觀摩，佢打算喺明年八月再帶隊進軍布拉格音樂節。呢個「超豪音樂之旅」為期十二天，只招待一百五十位學生貴賓，可以坐頭等機艙、郵輪，仲有得喺音樂節上表演，每位學生盛惠二十萬港元，但好多名人父母都爭崩頭報名。原來早前喺佢主辦鋼琴比賽中獲獎嘅小朋友，一樣有得去，屆時可以喺克羅地亞音樂會上表演，認真威水。
孫穎係布拉格音樂節常客，今年八月就與老師劉詩昆及來自美、英、法及意大利的音樂家同場較技，先坐A380頭等艙抵達杜拜，再轉乘郵輪。音樂會後，孫穎相約多位音樂家玩自駕遊，玩轉捷克、奧地利等歐洲多國。數難忘事，係來到奧地利湖區時，一位俄羅斯鋼琴家興之所至，想話找回童年回憶，二話不說走去買咗一批新鮮蘑菇，要求餐廳大廚加入雞蛋、洋葱及葡萄籽油，大廚三扒兩撥炒出家鄉風味，食到大家舔舔脷。
卓妮