中環出更：香港話劇團籌款 名人粉墨登場
成立三十五周年嘅香港話劇團，日前首次舉行晚會為劇團發展基金及戲劇教育基金籌款。當晚劇團理事會一班兄弟姊妹盛裝赴會，副主席伍翠瑤（Jennifer）仲粉墨登場表演魔術，其丈夫、金銀業貿易場理事長張德熙都有捧場，有「AO歌王」綽號嘅民政事務局常秘楊立門都開金口獻唱，同場當然唔少得同樣身為副主席嘅信興集團副主席蒙德揚（David）及主席胡偉民啦，晚會為基金撥備增加至三百三十萬元。
Jennifer話，自己前後加入咗理事會六年，好享受呢份工，事關世上有太多煩瑣事，但接觸話劇後，恍如進入咗另一個多姿多采嘅世界，忘卻煩憂。至於David當晚就以紅衫公爵造型搶鏡，當晚更表演極速轉裝。理事張心瑜（Fiona）都友情客串，高歌一曲《忘不了的你》冇難度，皆因佢經常登台獻唱籌款。為咗配合經典金曲，Fiona特意以旗袍配襯緬甸玉石頸鏈，高貴又大方，認真揼本。
易志明同仔女多咗溝通
新任立法會航運交通界議員嘅九龍倉董事易志明（Frankie）都喺度，佢都係劇團嘅理事。佢話依家兼顧立法會同公司業務，非常繁忙，依家瞓八個鐘已變得好奢侈。不過，自言「新丁」嘅佢話，可以入議會學習同聆聽唔同意見，辛苦都值得，但最難得嘅係，當選之後同屋企一對仔女溝通都多咗，不時討論社會議題。卓妮同場仲見到擔任話劇團司庫嘅立法會新貴鍾樹根，佢都買枱招呼一班競選團隊到場湊熱鬧，出錢又出力。
卓妮