勁勁勁！醒醒醒！一年一度渡海泳！
繼長洲搶包山之後，香港再有一項傳統活動鹹魚翻生，就係橫越維多利亞港嘅渡海泳嘞。當年搶包山之所以停辦，原因係曾經發生過不愉快事件，成個用竹棚搭出嚟嘅包山冧鬼咗，停辦之後幾經波折先至復辦。渡海泳又因乜事幹停辦嘅呢？咪就係海水污染囉，垃圾載浮載沉之餘，大腸桿菌多到嚇死人。經過一大段時間改善水質之後，維港終於唔再生人勿近，特區政府考慮到水質應該唔會令人屙嘔肚痛甚至病魔纏身，舊年開始復辦渡海泳。
前日喎，第二年復辦嘅維港渡海泳水花四濺，參賽人數突破一千六百個，年齡由十二歲至七十八歲，男男女女老老嫩嫩游得不亦樂乎。渡海泳由鯉魚門三家村公眾碼頭出發，浩浩蕩蕩游去西灣河海濱公園公眾碼頭，全程一千五百米。個人賽男子組冠軍係港隊代表凌天宇，女子組冠軍亦係港隊代表鄧穎欣，恭喜啊恭喜！
今年賽事加入第五屆亞洲公開水域游泳錦標賽，令參賽人數翻咗一番。主辦單位仲話呀，將會檢討比賽安全及場地安排，考慮下屆加入國際錦標賽，進一步振興維港渡海泳。
若然加入國際錦標賽振興維港渡海泳，功夫茶當然唔反對啦，之但係有一個問題始終要強調一下。喂，維港水質可唔可以確保不受嚴重污染o架？大家都知啦，環境局嘅環保工作一向烏厘單刀，莫講話海水污染令人擔心，空氣污染亦係令人皺眉。當年曾蔭權爵士嘅八月十五尚未移離特首寶座嘅時候，環保團體為佢改咗一個花名「氣候逃犯」，反映官老爺保護環境態度消極，家陣改朝換代嘞，情況有冇改善呀？即使冇乜大改善，都唔好衰過舊時囉，唔該！
主持過渡海泳鳴槍儀式之後，現任特首梁振英忽發奇想，佢話維港兩岸可以興建人工泳棚，畀中環同尖沙咀嘅上班族海中紓減工作壓力。對於呢個咁趣致嘅新諗頭，功夫茶都係嗰句，確保污染物質唔會損害環境先啦！
除咗渡海泳之外，香港一年一度都另有一項體育盛事o架，渣打馬拉松吸引無數本地同外地長氣袋一較高下。大家記唔記得曾經有馬拉松健兒不幸暴斃？致命原因有人歸咎於空氣污染。亦即係話，無論係振興渡海泳，抑或係振興馬拉松，優良嘅環境質素係必不可少嘅，否則搞出人命邊個賠得起呀！
其實講真吖，即使你唔係渡海泳嘅材料，你都有機會去泳灘游水，如果水質依然係混濁不堪甚至係污糟邋遢，游水都游得唔過癮啦。
一於咁話啦，若要渡海泳玩得開心游得勁，切勿污染損害環境！