貪曾卸任後，點樣安置佢至適當，據云成為政圈中茶餘飯後嘅話題。一時傳聞佢會接替年屆七十五歲嘅董建華做全國政協副主席，之不過，一個貪盡海陸空、歎盡省港澳嘅爵士，竟因貪而更上層樓，難道不怕如拾起一塊石頭扔到大雜院的毛坑裏——激起公憤？又或者如同文所形容：「政協甚麼鳥都有」，多隻貪鳥，難道會「鳥鳴山更幽」？
當今之世，誰為正邪定界別？唔通滿口仁義道德，一肚子男盜女娼可以做「聖人」？貪到聞名全世界嘅曾蔭權爵士，既然不甘寂寞做「隱士」，廉署又對佢展開調查，接董伯伯之位可能惹來話柄，是以又傳貪曾出任「政協常委」，要佢幫手「處理吓香港事務」。
呢個世界，反智原來真係有市場，貪曾在其位都不謀其政，只愛做離岸特首，雲遊列國，一晌貪歡住總統套房，發其春秋大夢，叫佢「處理吓香港事務」？咪玩喇！倒不如叫佢為香港埋多幾個地雷！睇吓幾時引爆，來個他比煙花更燦爛，咁都算沒有白來人間一趟！
這年頭，愛國有罪，禍港有獎，貪曾若真係出任「政協常委」，你不要驚訝，更毋須詫異；外國有許多有趣的定律，一條叫「莫非定律」的說：「天下事莫非倒楣事」（If anything can go wrong, it will！），這定律還有各種古怪的衍生定律，其中一條是「如果有幾個地方可能出亂子，真正出亂子的一定是最嚴重的一處。」既然甚麼鳥都有的政協，多隻貪鳥，說不定會衍生「貪鳥怪鳴到五更」新景象！