隨住人民力量同志議員陳志全（慢必）加入立法會後，議會隨即掀起一股同志熱，令一直致力推動同性戀平權運動嘅工黨何秀蘭（Cyd）唔使咁辛苦。無獨有偶，阿Cyd將會喺下月七日提出有關「同志平權」議員議案，入面將首次加入「反性傾向歧視」等條文，以及要求當局就立法展開諮詢工作。
慢必就話會先睇吓議案內容，再決定會唔會就原動議提修正案。但如果佢肯以用家身份企出嚟現身說法，相信一定會增加議案爆燈程度。
另外，慢必得到台灣同志遊行聯盟邀請，星期六會飛去台北出席一年一度嘅「台灣同志遊行」。佢話呢個活動已經舉辦到第十屆，但之前一直冇機會參與，所以都幾期待。慢必仲透露到時會以立法會議員身份代表香港上台發言，內容大致係呼籲選民唔好因性取向而唔投票畀有心服務市民嘅同志從政者，同埋鼓勵更多同路人「出櫃」喎。