壹傳媒集團主席黎智英（肥佬黎）出售台灣壹傳媒所有媒體業務之後敗走，但係佢並冇返到香港，反而係去咗美國。台灣壹傳媒倫理委員兼台大國發所暨新聞所合聘教授劉靜怡喺社交網站facebook（fb）發公開信，要求肥佬黎同佢哋對話，交代賣盤時有邊啲會影響員工嘅交換條件同承諾，點知肥佬黎就懶理，話自己已經身在美國，真係拍下屁股就走，睬你都傻！
劉靜怡尋日喺fb要求肥佬黎同壹傳媒新組成嘅工會公開對談，等當地同事可了解自己未來工作環境同權益保障，叫肥佬黎咪「一走了之」。點知肥佬黎就喺fb回覆自己喺「美國休息」，仲短期內都唔會返台灣，又講到明唔想講之前經營遭遇嘅事。
其實肥佬黎賣盤仲未完成全部交易，仍有好多變數，好似主要買家辜仲諒仍有官司在身，但肥佬黎偏偏就避走到美國咁遠，而唔係留喺台灣或香港收拾自己一手搞出嚟嘅爛攤子。之前有傳媒估計肥佬黎棄守台灣係因為「體力不佳、精力不夠」，唔通佢今次去美國唔係休息，而係休養？