中環出更：貪曾渡「長江」見李嘉誠
「貪曾」曾蔭權卸任前被揭發連串貪腐醜聞，佢喺香港都可以話係神憎鬼厭，所以七月後已避走加拿大，直到立法會選舉過後先至秘密返港。返港後嘅貪曾唔知係咪冇面見人，出入行蹤飄忽兼鬼祟，但仍難逃卓妮同市民嘅雪亮眼睛。不過，貪曾尋日一反常態，忽然好高調咁四出見人，有消息仲話貪曾尋日去過中環長江中心，同長實集團主席李嘉誠見面添！
貪曾返港後一直都好少露面，除咗日前一味靠黐跟富豪上咗浙江遊玩外，平日最多都係去吓教堂，或者同太太曾鮑笑薇出去食飯，但估唔到佢尋日撇開太太，自己一個外出連跑幾場。慣咗日日去教堂嘅貪曾，尋日如常朝早七點幾就去咗跑馬地聖瑪加利教堂，逗留約半個鐘就離開，然後返咗位於淺水灣道嘅寓所。
忽然高調會見多人
見貪曾屋企拉埋窗簾，本來以為佢又係着住背心同孖煙囱喺屋企玩自閉啦，點知中午見佢坐住架政府專車離開屋企，直駛去長江中心停車場，抵達時大約十二時三十五分左右。雖然唔見貪曾上落車，但據知貪曾之所以神神秘秘，其實係約咗李嘉誠食晏，不過傾乜嘢就唔知喇。
貪曾除咗食晏外，應該仲約咗人喺前特首辦見面，皆因下午三點幾鐘見佢着住整齊西裝、戴埋招牌煲呔喺前特首辦現身。貪曾返到前特首辦冇耐，就有一名着西裝嘅上年紀嘅男士坐住一輛平治座駕到達，入咗去十幾分鐘就同貪曾前後腳離開。貪曾見到卓妮喺度，就好勉強咁笑咗一吓，但問佢返內地玩得開唔開心時，佢就扮聽唔到，之後仲坐車走咗。唔知貪曾忽然咁高調見咁多人，究竟所為何事呢？
卓妮