一屋難求，一房難租，香港嘅居住問題愈來愈頭痛，頭痛到有人瞓豬欄，簡直係非人生活！
呢嗱嗱嗱，有人瞓豬欄並唔係開玩笑o架，舊年天水圍村屋大火，先至揭發過豬欄改建成劏房嘅荒謬例子。原來喎，豬欄劏房唔係個別情況，本報先後發現元朗最少有四個舊豬場以及雞寮非法改建，劏房規模媲美小型屋苑。
元朗八鄉大江埔村家陣有兩處劏房由雞寮改建而成，記者高空監察發現劏房分成兩排，大約二十個單位以磚塊建造，房間已經裝咗冷氣。附近嘅石湖塘村亦有同類劏房，由鐵皮同石屎建成嘅單位部分有兩層高，唔少門外掛滿衣物，住客不時出出入入。呢種單位雖然比較偏僻，之但係每月租金都要二至三千元，租客以新移民同南亞裔人士為主。
豬欄同雞寮改建成劏房當然係犯法o架啦，元朗區區議員黃偉賢就話嘞，農地非法改建成劏房嘅趨勢係兩、三年前興起嘅，狠批地政處跟進不力，變相縱容違例改建，要求加強執法以免情況失控。
雞係禽，豬係獸，迫於無奈晚晚瞓雞寮同豬欄嘅劏房居民，莫非禽獸不如？怪只怪香港嘅房屋政策天殘地缺，搞到安居樂業變成一個可望而不可即嘅都市傳說。
房屋政策有幾咁天殘地缺？就以土地資源分配為例吖，特區政府目前有二千一百幾公頃土地儲備，其中一千三百公頃用於主要係興建丁屋嘅鄉村式發展，扣除道路等等公共設施用地，實際上用於商業及非原居民房屋用地不足四百公頃。亦即係話，丁屋用地係其他用地嘅三倍以上，證明土地規劃嚴重失當。
唔好以為原居民好開心喎，佢哋一樣呻到樹葉都落，認為硬性規定建造三層丁屋太苛刻，唔准僭建更加係強人所難。所以咯喎，新界丁屋問題最近再次人氣急升，不但各界議論紛紛，連發展局局長陳茂波亦認同有檢討嘅必要。紛紛議論嘅意見五花八門，有人提出「丁權證券化」，允許丁權自由買賣；有人建議居屋換丁權；更加有人覺得丁屋冇必要限死三層高吖，不妨發展多層式高密度住宅，以此善用土地云云。
其實計功夫茶話齋，新界點會冇地皮吖，只不過官僚冇地盡其利之嘛。情況就好比一個亂七八糟嘅衣櫃，你話唔夠空間掛衫掛褲？咪玩啦，如果你將衫褲執得整整齊齊，掛多十套八套都得啦。目前新界土地用途正正係亂七八糟，唔係荒廢就係錯配，咁咪搞到蟻民被迫瞓豬欄囉！
一句到尾，陳茂波可以檢討丁屋問題，之但係全盤嘅房屋政策係唔可以忽略o架，否則繼續失策落去，唔通害人瞓街咩！