今屆立法會會期輸畀自由黨張宇人、失落財務委員會主席寶座嘅民主黨劉慧卿，似乎對財委會主席呢個位仲念念不忘。尋日十個泛民議員齊齊開記者會講全民退休保障，但卿姐左一句「張超雄議員你係咪有嘢補充」，右一句「莫乃光議員到你喇」，好似當緊自己主持會議咁。唔知佢技癢好想主持財委會，定係要緬懷做主席嘅風光日子？
最搞笑嘅係，卿姐鍾意做主席，其他泛民議員又好配合佢喎，好似新民主同盟范國威、工黨張國柱等，每次想發言都要向卿姐打眼色，等到「主席」首肯先發言，似乎大家都好有共識畀卿姐主持會議。唉，泛民如果有咁團結，就唔會搞到今日咁喇。
成個記者會入面，卿姐除咗主持會議之外，仲好鍾意主導記者提問，係咁要求記者問呢樣，問嗰樣，又話咁做記者唔得o架。睇嚟卿姐唔只掛住做主席，仲掛住以前做記者嘅日子喎。