政情：謝偉銓無時停「冷落」老婆
立法會開會短短兩周，建築、測量及都市規劃界立法會議員謝偉銓（Tony）已經忙到氣咳，皆因除咗逢星期三同五要開例會、內會同財會外，Tony仲加入政制、發展、交通等八個事務委員會，數目冠絕一眾新丁議員。Tony笑住用「以立法會為家」幾個字總結現時生活，話自己每朝九點返立法會睇開會文件，夜晚十點幾先勉強叫做晒成日工作可以返屋企抖抖。
雖然Tony日日忙到無時停，但依然畀人投訴佢做得唔夠好，邊個咁高要求？咪就係謝太囉。
向來勤力嘅Tony透露現時工作量同喺地產商打工時差唔多，又話依家得番星期二算係得閒啲，大呻連公司生意都少咗打理。佢引述太太話原本諗住老公入立法會後會有多啲時間陪自己，但點知佢依然咁忙，搞到太太成日詐型。Tony話做嘢幾忙都頂得順，但當務之急首要平息太太怒火，問Tony係咪諗到好橋氹番老婆，Tony淨係無奈咁話：「我會抽多啲時間陪佢o架啦！」