一直致力培訓政治人才嘅民建聯今屆推咗幾個新丁入立法會，新丁埋位兩星期即見真章。話說新丁之一嘅民建聯葛珮帆（EQ）上星期五開完會後，急不及待咁喺facebook暢談佢嘅「議會生涯」，一邊大呻連續三日開會，一邊埋怨泛民議員太多嘢講搞到佢「坐到頭痛，更為香港心痛」。不過EQ喺facebook呢段「勇敢的表白」就引嚟唔少網民圍插，有網民估計EQ因為坐住自己個頭，搞到齋坐都會頭痛，有網民為立法會有EQ感到心痛，亦有網民好「同情」EQ，勸佢咁辛苦就唔好做議員喇，不過EQ就好似唔多領情，尋日仲自行了結「議會生涯」，使出刪貼絕招。EQ就解釋話有網民留言有粗口，引起家長投訴。