政情：貪曾傳做 政協常委 繼續亂港
畀東方報業集團獨家揭發「貪盡海陸空」醜行嘅貪曾卸任後，點樣安置佢至適當，成為政圈中茶餘飯後嘅話題，早前就有傳佢會接替董建華做全國政協副主席。不過貪曾貪盡海陸空，歎盡省港澳，早已臭名遠播，而且已經接獲舉報嘅廉政公署，隨時可能會對貪曾展開行動，所以唔少人都對貪曾出任政協副主席有意見。最近就有消息傳出，話畀貪曾做一屆政協常委試下先，要佢幫手處理吓香港事務。不過貪曾其身不正，叫佢幫手，分分鐘仲搞到一鑊泡！
明年三月全國政協換屆，早前有傳聞就話全國政協副主席董建華因為已年屆七十五歲，差唔多係時候退落嚟，而且亦要安置貪曾，安置佢做呢個位，似乎適當不過。不過貪曾卸任前畀我哋獨家踢爆佢嘅連串貪腐醜聞，民望更加係低處未算低，所以唔少人都對貪曾出任政協副主席有意見。
對於點樣安置貪曾，最近有個新嘅講法，就係退一步，只做政協常委，先畀佢做一屆，到董建華退落嚟嘅時候，佢先坐上副主席個位，要佢幫手處理吓香港事務，實行觀察吓佢嘅表現。不過，貪曾惡名喺香港無人不曉，叫佢處理香港事務就算佢唔故意煽風點火、搞風搞雨，都分分鐘會小事化大，愈幫愈忙。
遊完西湖 返港即龜縮
貪曾嘅去向仲係未知數，但佢最近就返咗內地，喺杭州遊西湖、睇風景，揸住部單反相機周圍影，仲行咗當地幾個博物館，尋日仲見到佢最後嘅行蹤，就係去咗浙江朱家尖大青山國家公園參觀。喺內地勞師動眾又風騷嘅貪曾，返到香港就龜縮，出入都要警方G4陪同。我哋尋日就見到着住件淺藍色Polo恤襯米白色西褲嘅佢，同太太曾鮑笑薇喺警方G4陪同下坐政府專車由淺水灣道寓所去咗灣仔華仁書院教堂參加彌撒，跟住就去香港高爾夫球會食晏，出咗去唔夠三個鐘就返咗屋企拉埋窗簾玩自閉。咁又係，貪曾依家無權無勢，邊個得閒招呼佢吖？