中環出更：客家美食 谷肥余鵬春
客家炆豬肉、梅菜扣肉等客家菜深受老饕喜愛，雖然唔符合健康潮流，但係美味無法擋。廣東客屬社團聯合總會副主席余鵬春日前出席「客家文化節」活動時，自爆次次返到鄉下，就抵受唔住美食誘惑，結果一年內肥咗十一磅添！
大搞「客家文化節」
同場嘅總會主席梁亮勝話，香港嘅客家人有二百萬咁多，為咗將客家文化嘅趣味及深度介紹畀市民，佢哋決定大搞「客家文化節」，活動包括下月中旬探討客家文化嘅論壇，仲有「尋找香港客家村」通識一日遊，帶市民深入走訪大埔客家村落及祠堂，同埋品嘗客家圍村盆菜。
最精彩莫過於「全城同享客家菜」活動，鼓勵市民「起筷前，先拍照」，凡幫襯參與食肆推介嘅客家菜，影相後分享到社交網站，即有機會獲得巨獎，都咪話唔吸引。活動當日，彩福樓分區廚部總廚梁偉光專登到會供應炆豬肉、梅菜扣肉等經典菜式，難怪身兼活動籌委會主席嘅余鵬春，一見到美食就愛恨交織。