中環出更：李小鵬肉緊觀戰 心急做馬主
體操名將近年各有「錢」途，「體操王子」李小鵬都開公司做「金牌經理人」，為跳水隊同體操隊成員謀出路，搵廣告代言。小鵬對賽馬都好有興趣，尋日就代師兄李寧入馬場，為「桂花飄香」打氣，更落注撐到底，可惜匹馬臨衝線被力壓，僅得第二，小鵬坦言有啲失望。
退役多時嘅奧運金牌名將李小鵬，胸肌依然澎湃，現身跑馬地馬場時，星味依舊。第四場開跑前，小鵬一早與友人企喺賞馬圈，聚精會神觀賞戰駒狀態，但就唔見馬主李寧。開跑一刻，見慣大場面嘅佢，肉緊地為「桂花飄香」吶喊助威。誰知終點前，領頭位置不保，只得第二。
CY宴請工總高層
雖然獎金有十一萬八千多元，但捧慣金牌嘅小鵬，難掩落寞神情。不過轉過頭，佢又發揮打不死精神：「其實跑第二已經唔錯了！」小鵬到底落注買咗幾多就唔講嘞。玩得咁high，佢興致勃勃話，渴望盡快做馬主喎。
尋日馬場仲有另一批稀客，就係特首梁振英（CY）及工業總會一眾高層。CY繼早前喺馬場宴請咗廠商會，尋日又宴請工總一班「大哥大」，交流香港未來工業發展。工總主席鍾志平、副主席劉展灝、前主席孫啟烈、行政會議成員林健鋒、經民聯主席梁君彥及特首辦主任邱騰華等齊出席。餐飯傾足三粒幾鐘，到底傾乜咁開心？孫啟烈會後話，佢哋建議CY重新推動香港工業發展，包括納米及稀土技術等，CY細心聆聽，話會認真考慮喎。
卓妮