開講有話，山寨貨冇好嘢。好似香港嘅強積金咁，據講係學自新加坡，可惜學啲唔學啲，人哋係中央公積金，嚟到香港就變成「強迫金」，正式係南橘北枳，唔湯唔水，不倫不類。
呢，連積金局主席胡紅玉都承認，現時強積金收費過高，下月將會發表研究報告，建議監管收費，包括考慮設定收費上限喎；佢仲話，唔排除由政府做強積金嘅公共受託人添。
嗱嗱嗱，香港同新加坡嘅最大分別係，新加坡政府願意承擔，孭起管理基金同保障回報嘅責任，打工仔無憂無慮，唔使擔心血本無歸；而香港政府就淨係識得卸膊，將強積金交畀私營金融機構管理，搞到行政費又貴，回報率又低，打工仔按時按候供款，結果為人辛苦為人忙，養肥咗一班基金經理。
唔講唔知，強積金數額愈滾愈大，受託人及基金經理就愈來愈肥，依家每年總共收取約七十億元管理費，而且仲不斷上升緊添，你話佢哋食水深唔深吖？最離譜嘅係，李國寶任主席嘅東亞銀行「東亞日本股票基金」竟錄得平均每年負一成四嘅回報，即係投資一萬元就蝕咗一千四百元，問你怕未。打工仔淪為金融大鱷嘅點心，政府害人害物，呢啲咪就係如假包換嘅官商勾結囉！
所以話，強積金先天不足，後天失調，一開始就係怪胎，無論當局依家點樣修修補補，改頭換面，都冇可能將怪胎變成人見人愛嘅天使o架。好似「半自由行」咁吖，話就話打工仔可以將自己供款部分轉移去另一個受託人，其實咪又係塘水滾塘魚，換湯不換藥，隨時由一個火坑跳落另一個火坑添，盞嘥氣。
至於設定收費上限咯喎，積金局都話嘞，呢個牽涉到法律問題，一時三刻解決唔到，等得嚟蚊都瞓，蛇都死喇。老實講，如果政府淨係識得修修補補，功夫茶寧願你哋畀番啲錢打工仔自己投資好過，正如有人話齋，自己投資隨時叻過基金經理，佢哋何德何能收咁高管理費吖！
即係咁，如果政府真係為打工仔着想，有心完善退休保障制度，功夫茶有兩個建議。第一，學新加坡實行中央公積金，由政府或者金管局負責管理及投資，盡量減低管理費，並提供回報保障，以免打工仔任由基金經理吸血；第二，盡快研究全民退休保障制度，將強積金作為過渡措施，慢慢轉化為全民退保。呢，日前政務司司長林鄭月娥咪承諾研究全民退保嘅，希望佢唔係大隻講嘞。
無論點都好，強積金實施十一年，畀人鬧足十一年，依家係徹底檢討、撥亂反正嘅時候喇！