立法會大會係議員爭取曝光嘅地方，所以班議員都會積極提出質詢博提升知名度。咁多政團之中就以工聯會最搏命，幾個新丁已經蜂擁提出多條口頭及書面質詢，力谷上鏡，唔放過任何一個機會。不過，啱啱復會可以討論嘅議題唔係好多，搞到大家嘅質詢撞到七彩，好似新界東北發展、免費電視牌照咁，都有幾個議員喺嚟緊周三大會上提出，可能會聽到大家瞌眼瞓，睇嚟大家要買定咖啡提提神。
工聯會幾個新丁嚟緊兩次大會都會提出口頭質詢，鄧家彪同郭偉強就問強積金及最低工資，直選嘅麥美娟就會問政府會否興建新街市，連同老臣子陳婉嫻、王國興，佢哋搶咗五條口頭質詢及兩條書面質詢。至於泛民主派新丁就以公共專業聯盟莫乃光最勤力，連續三次會議都有提質詢。
民建聯蔣麗芸亦都成功爭取提問，但兩次都係講舊樓維修，質詢都循環再用，真係夠晒「環保」。