政情：馮檢基「拋妻」遊墾丁
民協早前一直喺滅黨陰霾中掙扎，但馮檢基（KK）最後成功喺立法會超級區議會選舉力保一席，總算可以鬆一口氣。新一屆立法會已開鑼，KK就趁臨近重陽節假期，尋日一個人去台灣墾丁風景區休息番幾日，順便去埋高雄玩，叉夠電再返立法會搏殺。
KK話，短短兩年內經歷區議會同立法會兩次大選舉，選舉後恢復過來，嗰頭就要面對排山倒海嘅立法會會議，都咪話唔辛苦，所以點都要慰勞自己放吓假。佢又話，連埋重陽節假期都係只得四日假，根本唔可以去得太遠嘅地方，加上自己一直想去墾丁，故前幾日拿拿臨去買機票同訂酒店。
KK嘅太太喺理工大學負責行政管理工作，KK話老婆依家忙住處理新課程及學生住宿等棘手議題行唔開，佢惟有獨自去偷歡。原來佢讀大學時試過一個人去尼泊爾流浪一個月，佢話當時成個月都講咗唔夠二十句說話，所以相信今次墾丁之行唔會覺得孤獨喎，唔怪得佢咁多年來一個人喺立法會孤軍作戰都唔怕悶喇。