政情：翁狄森延續中國首飾史
中國首飾史源遠流長，但近百年來大部分首飾都係西方珠寶，剩餘嘅中國首飾都係用作嫁娶，著名珠寶設計師翁狄森（Dickson）就希望可以重建中國首飾品牌，延續已沒落嘅中國首飾史。Dickson話，近代中國珠寶設計被西方一體化影響，又因中國首飾設計師細膽，怕推出嘅中國珠寶唔賣得，因而搞到迷失咗發展方向。
Dickson早前幾經辛苦，喺北京搵到一本關於中國首飾史嘅書籍，點知一打開，就發現段歷史只係寫到一九一一年就中斷，足足一百年冇咗下文。佢話，另一個令中國首飾沒落嘅原因，係因為現今中國冇帝制，所以毋須要一套皇室御用嘅首飾，因而令中國首飾失去重要性。
為咗延續中國首飾史，Dickson依家喺四川美術學院致力培育珠寶設計人才，亦積極創作更多富含中國特色嘅精美首飾，好似象徵如意同長壽嘅戒指及耳環等。鍾情武俠片嘅佢仲預告，旗下品牌「YEWN」會喺明年中推出融合武俠元素嘅首飾添！