政情：泛民無恥靠害40萬長者
泛民主派議員為求迫使政府跪低，撤銷長者生活津貼計劃嘅資產申報制度，日前聯署要求押後表決計劃，想以緩兵之計拖延計劃，變相搵四十萬長者利益嚟較飛，認真無恥。不過，勞工及福利局局長張建宗（小肥張）尋日就踢爆，有上屆議員早喺今年七月，已經提出召開特別財務委員會通過撥款，以盡快落實前稱「特惠生果金」嘅長者生活津貼。我哋翻查紀錄，發現呢位咁心急嘅仁兄，正正就係來自要求押後表決計劃嘅民主黨（白鴿黨）前議員李永達（高達）。
轉軚有前科 遭本報踢爆
全港四十萬合資格長者能否如期喺明年三月，領取每月二千二百元嘅長者生活津貼，本周五就會喺財委會揭盅。小肥張尋日出席活動時表明，長者生活津貼計劃唔會改變或押後，否則趕唔切如期派錢。小肥張更踢爆話，其實早喺今年七月，已經有泛民議員要求當局即時向立法會提交文件，召開特別財委會處理，反映民情都想盡快通過措施。而當時啱啱上台嘅特首梁振英隨即回應議員，兩日後宣布推出長者生活津貼計劃。
呢位急長者所急嘅人就係前議員高達，可憐嘅係佢喺立法會選舉競逐連任失敗，而佢嘅黨友重返議會後，就將佢嘅建議忘記得一乾二淨，齊齊「打倒昨日的我」，聯署要求押後表決計劃，對於成日將民生掛喺嘴邊嘅泛民議員來說，實在令人咋舌，好彩多得小肥張溫馨提示。
社福界促先落實勿押後表決
事實上，泛民轉軚早有前科，本報上月率先踢爆公民黨梁家傑同工黨何秀蘭，早喺○八、○九年多次表態支持新界東北發展計劃，但近期一個屈尾十就轉軚反對，完全係同高達同出一轍。
長者貧窮問題愈來愈嚴重，作為社福界一分子嘅香港社會服務聯會行政總裁方敏生，尋日喺同一場合都表明，唔贊成立法會押後表決計劃，心水清嘅佢話擔心計劃一拖就唔知拖到幾時，仲話寧願先落實咗計劃，然後再檢討調高津貼金額同資產上限。嗱！呢啲咪真正做到急市民所急囉，一眾「無齒」嘅泛民中人明唔明呀？