中環出更：廠商會青委撐學生拍短片
智能手機普及化，隨時隨地拍片已成為潮流，而中華廠商聯合會第四度舉辦廣告短片創作比賽，今屆有近二百個中學組別參加。廠商會青委主任顏明潤（Jaclyn）自稱都係拍片愛好者，每日至少要拍一段，主角係兩個分別兩歲幾及半歲嘅囝囝，佢話依家係愛兒正值最可愛時期，呢個一瞬即逝嘅珍貴時刻唔拍低，驚第時會唔記得喎！
Jaclyn話，大仔Meldric活潑又精叻，已經識得背詩，仲好有創作天分，一聽到音樂就會創作歌詞，笑到佢碌地。細仔Cedric剛剛學識翻身，雖然未識講嘢，但已經牙牙學語，周圍撩人傾偈。Jaclyn妹妹顏明秀（Candy）笑指自己做全能保母，包揸車接送兼湊B，實行錫到兩外甥燶晒。
參賽水準高
其他青委成員張永鴻、羅程剛、劉子芸、林蘭詩都齊心現身宣傳活動，佢哋見住參賽學生水準愈來愈高，創作力強兼電腦知識豐富，唔少學生拍出超水準短片。首次贊助活動嘅港產陀飛輪萬希泉創辦人沈慧林（William）都出席，佢話廣告對產品好重要，現正計劃搵國際巨星為旗下品牌拍廣告喎。