中環出更：見證逾12萬人「復明」 陳振彬感觸多
幫助內地貧困白內障患者復明嘅「健康快車」，眨眼已十五歲生日，日前喺灣仔君悅舉行周年慈善晚宴，城中名人踴躍買枱做善事，一晚籌得二百五十萬元。「健康快車」香港基金名譽主席陳振彬驚嘆時光飛逝，佢見證逾十二萬患者重見光明，感觸良多，所以呼籲更多年輕人加入健康快車義工行列，到內地扶貧，順便學習國情。
晚宴上善長不絕，莎莎太子女郭詩慧、太子珠寶鐘錶主席鄧鉅明等齊買枱支持。郭小姐忙湊仔未有現身，將枱送贈生日嘅珠寶公司太子女吳嘉淳（Gretchen），佢邀請內衣店老闆李卓峰、香港著名金像獎攝影師鍾有添等好友，一同舉杯慶祝。靚太蘇嘉怡就同老師周志坤大耍「舞功」，勁跳多隻拉丁舞籌款。
靚太護膚有道
鄧鉅明太太鄧宣宏雁（Emily）就請埋愛沙尼亞共和國名譽領事林建康夫婦出席。講起醫學美容搞出禍，Emily指着面頰上嘅雀斑話：「你見我咁多斑，就知我乜都唔整啦！」不過，Emily就對學氣功心郁郁，坦言見朋友學氣功後面色紅潤有光，一於拜師學藝。Emily又自爆戒吃紅肉多年，只食白肉，難怪皮膚滑不留手。佢嘅好友林太黃寧艷就直言只敢做傳統美容，激光都唔敢打，事關皮膚太薄，寧願勤啲煲靚湯滋潤吓，肌膚一樣咁靚。
卓妮