屯院疑失誤婦折騰10年
「醫院做錯一次當係我唔好彩，但係點解可以錯完又錯！」有婦人十年前於屯門醫院剖腹生產後腹部即有異物凸出，直至去年才接受修補手術，但近日傷口附近竟有一段「線頭」從體內凸出，疑屬醫療失誤！關注病人組織直指拖延多年才作處理的情況不能接受，要求院方加強與病人溝通，避免同類事故再次發生。
陳女士（化名）○二年剖腹生產，未幾腹部即有一如乒乓球般大之異物凸起，小便頻密及出血，已安排於翌年重返屯院接受手術，但因爆發「沙士」而令手術不了了之。「佢哋從來冇檢查過凸出嚟嘅係咩，淨係開抗生素，呢十年嚟晚晚冇覺好瞓，好辛苦！」
前年陳自行向私家醫生求診，證實凸出異物為膀胱移位，去年才在屯院接受手術，惟手術後尿頻及腹痛加劇，近日傷口更長出膿瘡並驚見一段「線頭」，「真係好驚，唔知入面仲有啲咩！」
屯院發言人證實，病人○二年剖腹生產後，腹部筋膜出現一個約一點五厘米之疝氣，去年接受修補手術，有關腹部膿瘡出現的「線頭」乃用以固定人工纖維膜之縫線，並非手術錯誤遺留。由於修補手術縫合位置較近表皮，對皮膚造成壓力而形成膿瘡，手術用物料可能隨灌膿引流露出體外，醫生已作清理。
發言人強調，筋膜位置出現疝氣為腹部手術已知風險，手術前已向病人解釋。醫療紀錄並無診斷病人有「膀胱移位」。院方今年四月為病人進行盤腔超聲波檢查時亦無發現異常。
「醫生冇話手術醫疝氣」
「講大話！我做完手術問過醫生凸出嘅係咩，佢親口話係膀胱，但就冇話手術係醫疝氣！」陳女士不滿院方多年來一直逃避責任，且未有提供適切治療。
香港社區組織協會幹事彭鴻昌指上述情況並不常見，如病人久未獲安排適當診治，可向病人聯絡主任求助，「如果異物凸出情況持續，醫院唔應該拖咁多年先處理，可能係醫療程序出咗問題！」彭指病人簽署手術同意書前亦需清楚了解手術內容及風險，以保障權益。
婦產科專科醫生靳嘉仁解釋，人工纖維膜會有四條固定線連至皮膚層，與皮膚組織產生纖維化，承托纖維膜，「如果塊膜放入體內嘅過程感染到細菌，或者手術後傷口處理得唔好，都會有機會令傷口發炎流膿，令固定線唔能夠同皮膚組織產生纖維化形成膿瘡，將線段推去皮膚面層。」靳建議病人盡快求醫，切勿自行拉拔或剪斷線段。
投訴組