黎智英敗走台灣，壹傳媒在台業務全面賣清光，聽講旗下員工高興到拍爛手掌，認為未來將會有一個好事頭，唔使好似家陣咁受盡無良老闆嘅委屈。同一時間，香港都有一批打工仔拍爛手掌，因為即將大幅加薪，最勁嘅加幅係百分之三十，最少都有百分之五，可能有人諗緊燒炮仗慶祝。
今時今日邊有打工仔咁好景o架？呢嗱嗱嗱，大家唔好以為功夫茶講笑呀，得到大幅加薪待遇嘅係建築工人。建造業總工會公布，十幾個工種嘅工人下月起加薪，預計受惠者超過二十萬。加薪幅度最勁嘅係模板工人，日薪由一千元調高至一千三百，即係增長三十個巴仙。其次係搭棚工人，加幅亦有兩成，日薪由一千元加至一千二百。泥水工人叫做最黑仔o架喇，不過日薪加幅都有百分之五點三，你都咪話唔令人羨慕。
因乜事幹建築工人受到特殊禮遇嘅呢？原因一字咁淺，人手短缺。總工會話呀，今次加薪係同商會以及專業承包商經過多次磋商而達成嘅協議，模板等等多個工種嘅人手不足以應付需求，希望以較高工資吸引年輕人加入建造業。總工會理事長周聯僑仲話，現時超過一半嘅註冊工人年過五十，擔心青黃不接。
建築工人忽然之間咁吃香，無他嘅，好多大型基建終於唔再紙上談兵，郵輪碼頭呀，港珠澳大橋呀，廣深港高鐵呀，家陣都施工得如火如荼。仲有喎，梁朝新政府希望加快興建公營房屋，回應市民安居樂業嘅訴求，建造業人手唔緊張至奇啦。喺咁嘅情況之下，建築界形容自己正處於「黃金五年」。
如果人手真係咁緊張，係咪有必要考慮輸入外勞呢？對於呢個問題，功夫茶贈你四個字：唔好玩啦。喂，輸入外勞好敏感o架，本地工人一定擔心飯碗被搶，靠基層勞工送入立法會嘅議員一定唔肯過你，特首梁振英如果夠膽死拋出方案諮詢諮詢，反對派唔嗌「落台」都會嗌「撤回」。
工人有薪可加當然係好事啦，香港嘅失業率有機會再尋底添，之不過有一個問題必須正視，人手短缺會唔會損害基建質素o架？你知啦，基建牽涉人命安全，萬一好似偉大祖國咁，哈爾濱有條橋通車冇耐就砰嘭一嘢冧咗，冧橋原因居然撒賴話係貨車超載喎。
即係咁，冇人願意見到香港基建出現豆腐渣工程，人手短缺就千方百計增加人手，人工唔夠吸引力就加到夠為止，千祈唔好犧牲基建質素呀，老友！
開講都有話，重賞之下必有勇夫，若然建築工人薪金夠高，話唔定敗選立法會嘅失業政客都走去地盤擔擔抬抬啦。