上屆立法會有「四大懶蟲」周不時唔開會，不過新一屆立法會暫時就冇呢個情況，即使身兼港區人大代表嘅六名立法會議員，遇到人大考察行程同立法會各事務委員會選舉撞到正一正，為咗表示對立法會工作嘅重視，都決定提前返港投票，另外又可以坐定定撐特首梁振英喺今日發表施政理念，認真一舉兩得。
每年三月北京「兩會」期間，身兼人大政協嘅議員要中港兩邊走，殊不知呢個情況延續到人大考察團。據聞人大考察團上周四出發訪問雲南，理應後日先結束，不過身兼人大嘅黃國健（KK）同廖長江等六名議員有雙重身份，經過權衡輕重後決定一同趕返香港。KK話，今次提早回港主要係立法會新開局，大家都希望做得好啲喎。
事實上，港區人大每年都會定期到內地訪問考察，過往亦曾多次出現同立會會議撞期，搞到有雙重身份嘅周圍撲，都咪話唔辛苦同氣咳，唔知有關方面會否從善如流，盡量避免有類似情況發生呢？