政情：陸恭蕙甫上任即搞執笠
環境局副局長陸恭蕙（Christine）上任個多月，除咗忙於處理環保工作，原來亦忙住搞執笠。環境局尋日將Christine嘅利益申報資料上網，證實佢已辭任被指有利益衝突嘅思匯政策研究所所有職位。
申報書顯示佢原來仲持有兩間公司嘅股份，其中一間係佢全資擁有嘅英屬處女島註冊嘅投資公司，但已無運作一段時間，現正進行清盤程序。
另一間係名為「寶時顧問有限公司」嘅公司，Christine持有一半股權，另一半就由同佢媽媽、亦即太古洋行首任買辦莫任揚後人莫綺萍持有，同樣係搞緊清盤。
Christine雖然有一個女，但係喺外國搵代母生嘅，申報書寫佢現時並無配偶。Christine擁有嘅物業唔多，只有一個喺中西區嘅自住單位，其他聯繫方面就有「關懷愛滋」贊助人、聖保祿學校校友會同外國記者協會成員等，都唔算複雜。