政情：葉劉卿姐撈亂議會新丁
今屆立法會新議員有廿七人，要認得晒真係要花啲心機。尋日立法會公務員及資助機構員工事務委員會開首次會議，暫代主持會議嘅民主黨劉慧卿就將商界（第二）議員廖長江認錯咗係勞聯嘅潘兆平。到新民黨葉劉淑儀坐正做主席時，又將工聯會嘅鄧家彪同郭偉強撈亂。
立會秘書亦搞錯
尋日委員會第一次開會，首要工作係選委員會正、副主席。廖長江舉手提名葉太做主席，點知代為主持會議嘅劉慧卿同秘書細細聲講咗兩句之後就話︰「潘兆平議員提名葉劉淑儀議員。」坐喺較後位置、冇舉到手嘅潘兆平即刻話「我喺度喎」。呢個時候劉慧卿先知自己叫錯名，惟有話「唔好意思，我同秘書都搞錯咗。」
葉太喺冇競爭下自動當選委員會主席後，輪到選副主席，鄧家彪舉手和議潘兆平做副主席時，葉太就將鄧家彪個名叫咗做「郭偉強」，真係尷尬。睇嚟新、舊議員真係要多啲聯誼吓，否則自己同事都唔認得就唔係幾好啦。