政情：鄉頭轟張學明手指拗出
平靜咗一排嘅鄉議局，又再風起雲湧。不過今次矛頭唔係鄉議局主席劉皇發，而係副主席張學明。事緣部分鄉委會主席覺得學明「升呢」做咗行政會議成員後，似乎從未開過聲撐僭建，無將新界人聲音帶入行會，批評佢手指拗出唔拗入，同以前發叔嘅做法好唔同。
由於學明無幫新界人講好說話，尤其係村屋丁屋僭建問題，已經令班鄉頭好大怨氣。學明另一罪狀就要數番個幾月前，部分鄉頭覺得佢身為鄉議局中人，寧願撐民建聯葛珮帆都唔撐鄉事派邱榮光，擺明同自己人過唔去，同拆自己祠堂無乜分別。
浮現「倒張」風潮
所以近排鄉議局浮現一種「倒張」風潮，發叔上屆做咗行會成員後，有大批鄉頭自動波幫發叔搞慶功宴，但今次學明做咗行會成員，無人肯擺番幾圍酒賀下佢。除咗咁，據聞連學明自己屋企僭建嘅舊聞，都被傳媒重提舊事，插佢過咗成年都未拆僭建物，呢啲真係禍不單行喇。但我哋尋日問咗佢回應，佢話自己跟足程序入紙申請拆屋，只係政府未批喎。