中環出更：余彭年捐逾千萬獎學金
年屆九十嘅大慈善家余彭年尋日宣布，向香港大學、中文大學、理工大學及科技大學各捐出四百萬元獎學金，作為培育成績優異但家境清貧嘅大學生之用。出席儀式嘅科大副校長翁以登（Eden）對獎學金特別有感觸，自爆喺美國讀大學時，甫入學一個月就遭逢父親去世，幸好及時得到獎學金，先至得以完成學業。
四間大學清貧生受惠
Eden話，當時母親係家庭主婦，父親突然離世令家中失去經濟支柱，壓力好大，所以佢好明白獎學金嘅重要性。今次學校獲得四百萬元獎學金，將會有一百名學生受惠，每名獲三萬八千元資助，餘下廿萬元作為行政費用。同場仲有中大校長沈祖堯、理大校長唐偉章及港大副校長周肇平。
余彭年話，過去佢專注喺內地行善，特別係以醫治白內障患者為主嘅光明行動，自言對教育事業關注不足，希望喺有生之年為教育下一代作出貢獻。佢希望年輕人求學不為升官發財，並為受資助學生開出三個條件，除咗成績優異、家境清貧之外，仲需具有忠孝仁愛嘅高尚品德添！