中環出更：周國豐賣百萬元靚床
本身係律師嘅社交界名人周國豐（Brandon），三個月前開店做英國豪華睡床Vi-Spring代理，成為律師工作之外嘅第一盤生意，愈來愈多身嬌肉貴嘅城中名人幫襯。日前卓妮喺《茶花女》預演酒會見到Brandon，佢話呢個牌子已有過百年歷史，連英國皇室成員都係捧場客，最貴嘅一套睡床（含床架及床褥）叫價一百萬元添！
隨時唔做律師
點解Vi-Spring要賣幾十萬至一百萬元咁貴？Brandon解畫話，佢哋嘅賣點係用至靚嘅全天然材料作填充物，例如奧地利一級馬尾毛，以及極珍貴嘅駱馬毛（Vicuna），優點係夠晒排濕、透氣及保暖，仲係度身訂造，純手工製造，終身保用，總之物有所值喇！
講起做呢盤生意嘅原因，Brandon話自己經常瞓得唔好，所以成日趁出遊周圍試床，有次試瞓呢個牌子，感受迥然不同，遂決定做香港代理。佢兩個囝囝嘅BB床都係度身訂造，夜晚瞓得特別香甜喎！佢又透露，已另開一間唔同品牌嘅床店，唔排除日後唔撈律師呢行添！同場嘅太子珠寶主席鄧鉅明（Jimmy）話，用幾十萬買張床好似好誇張，但係諗深一層，人生有三分之一時間喺床上，攤開嚟計就唔係特別貴，所以佢都用咗四十幾萬元買張床，下個月初到港交貨。
當晚去欣賞歌劇嘅仲有中華電力企業發展總裁莊偉茵夫婦、前教育局局長孫明揚夫婦及前立法會議員陳淑莊，莊偉茵係樂團「Young Once」主音之一，佢笑稱最近轉新工，忙到連自彈自唱嘅時間都冇。
卓妮