功夫茶尋日都講過嘞，現時香港窮到燶嘅老人家愈來愈多，偏偏強積金表現不孚眾望，所以有必要考慮設立全民退休保障，以便長命百歲嘅公公婆婆有得安享晚年。言猶在耳啫，消委會發表報告，一嘢踢爆強積金嘅廢柴真面目。
強積金制度實施已經十一年嘞，表現有幾廢呢？消委會今年七月至九月研究分析十五間強積金公司，發現一百五十九隻基金過去五年平均年度回報錄得負數，佔可作比較基金嘅四成半。換言之，接近一半基金都蝕錢呀，蝕得最勁係李國寶做主席嘅東亞銀行日本股票基金，每年狂蝕百分之十四，該你個煨！
蝕錢固然係一個傷荷包嘅問題，收費昂貴又係另一個傷感情嘅問題。消委會發現最大咬嘅基金收費高達百分之四點六二，最親民嘅係百分之零點一七，兩者相距二十六倍。收費昂貴如果有辦法幫客仔賺到錢，肉痛得嚟都叫做條氣順少少，奈何情況並非如此，基金經理隨時佣金落袋之後令你蝕到一殼眼淚，失晒積穀防飢嘅應有意義。
你知啦，基金收費直接影響戶口結餘吖嘛，收費愈大咬，客戶愈遭殃。以每月供款二千元為例，假設每年回報百分之五，基金收費百分之一，三十年後投資者可以取回一百三十九萬元，若然基金收費增至百分之二，就會少收二十二萬，如果基金收費百分之三，收益更加少咗四十萬。你話嘞，退休之時揸住雞碎咁多錢，係咪有機會臨老過唔到世？
所以話啫，強積金呢家嘢真係令人好鬼死閉翳o架，簡直就係食之無味、棄之可惜嘅雞肋。好衰唔衰，唔想供款又唔得，加碼供款都唔得，眼白白養肥一班倒米嘅基金經理。
咁點算好呢？冇o架喇，惟有寄望政務司司長林鄭月娥唔好講大話囉。司長大人話喎，扶貧委員會轄下將會設立社會保障及退休保障小組，由佢親自揸旗領導，希望能夠改善咁話。亦即係話，特區政府可能或者有機會左研究右研究，然後推出退休保障計劃。若然成功推出，香港市民可能或者有機會唔使老來無依。
香港社會服務聯會發表貧窮數據，以住戶每月入息中位數嘅一半界定為貧窮線，整體窮人係就係受惠於最低工資而減少五萬五千人，不過長者貧窮率不跌反升，由百分之三十二點五上升至三十二點七，每三個老人家就有一個朝不保夕。
嗱，林鄭司長唔好車大炮呀，退休保障計劃真係要好好研究，事關單靠強積金隨時餓鬼死o架。至於消委會嘅意見，即係基金收費有下調空間，好心各大強積金公司從善如流啦，當係積番少少陰德，安全過渡到收尾幾年吖嘛！