身為唐營嘅廠商會立法會議員林大輝過去四年經常喺立法會就《稅務條例》第39E條提出質詢，奈何政府答嚟答去都係嗰句，大輝今屆索性轉型，專攻教育議題，聽日佢就會喺立法會書面質詢有關國民教育嘅議題，但一條質詢竟細分十六條問題，睇完都唔知佢對國教嘅立場係反對定贊成。
立法會各常設委員會今日就會選出主席，由於建制派已經傾掂數，如無意外，林大輝會當選教育事務委員會主席。大輝係一間中學校監，今次似乎有意洗去「工業味」，所以質詢頭炮都係圍繞教育議題。不過佢一條質詢分拆成十六條問題，而且內容條條差唔多，唔夠一針見血。
立法會除咗質詢環節，仲有每周兩項嘅「議案辯論」，泛民議員就好好彩喇，抽中晒頭三個禮拜共六項辯論，加上公民黨陳家洛提出「十‧一海難」休會辯論，令立會頭三周成為泛民主場，佢哋識唔識得運用就要靠佢哋自己喇。