民主黨（白鴿黨）為博出位要求政府取消長者生活津貼需資產審查，搞到佢哋嘅「大腦」、扶貧委員會籌備小組成員羅致光都唔抵得，公開話同佢哋意見不合。白鴿黨隨住羅致光同埋因為一句支持國民教育而被該黨狠批嘅狄志遠漸漸淡出，可以話係人才凋零。冇咗「大腦」嘅白鴿黨依家慘到連黨內嘅政策小組都要請「外援」幫手，真係自作自受。
白鴿黨代主席劉慧卿尋日就話，佢哋嘅各個政策小組將會邀請外界對唔同政策範疇熟悉或一向有研究嘅人士加入，小組主席亦唔再一定係黨內嘅立法會議員。話就話係想聽多啲社會意見，睇怕其實係因為羅致光、狄志遠等溫和、講道理嘅人淡出，佢哋冇晒橋就真。
白鴿黨已經冇咗「大腦」，劉慧卿尋日仲講到明佢唔會競逐黨主席，因為冇興趣咁話，佢甚至會連中委都唔做。其實白鴿黨選舉後唔再係泛民大黨，大家乘機跳船都唔奇，依家仲話請外援，都唔知有冇人吼佢哋嘞。