政情：徐英偉禾稈冚珍珠
副局長同政治助理逐一遞交利益申報，最新曝光嘅資料，係民政事務局局長政治助理徐英偉（Caspar），原來佢連同家庭成員共同擁有嘅物業，包括美國拉斯維加斯嘅分時度假物業在內，合共有四個海外同本地物業，仲多過佢直屬上司、民政事務局局長曾德成三個本地物業。Caspar平時唔聲唔聲原來都有幾多磚頭喺手，唔知呢啲係咪叫做「禾稈冚珍珠」呢？
Caspar上任不足十日迅速遞交利益申報，當局亦已上載至當局網頁供公眾查閱。Caspar報稱連同家庭成員共同擁有四個物業，當中三個係分布喺加拿大溫哥華嘅出租住宅物業、加拿大多倫多供家庭成員居住嘅住宅物業，以及美國拉斯維加斯嘅分時度假物業，唯一喺本地嘅物業，係同太太各佔一半業權，位於九龍深水埗區嘅自住物業。
坦言全部物業仲供緊
事實上，喺加拿大讀書嘅Caspar擁有物業嘅數目比起部分政治委任官員為多，暫時喺芸芸政助中算較為富有，好似同為政治助理嘅陳岳鵬，僅擁有港島堅尼地城自住物業；倘若同局內同事相比，Caspar亦勝一籌，因為如果直接同佢直屬上司曾德成比較，Caspar既有海外又有本地物業共四個，相反曾德成只有三個本地物業；至於民政事務局副局長許曉暉更報稱只有一個出租住宅物業。
Caspar年僅三十多歲就已經有幾個物業喺手，認真唔簡單，當然要問個究竟。Caspar接受查詢時保持一貫謙厚態度，坦言全部物業都仲供緊，又話「失業就好頭痛」，總之佢哋兩公婆會量力而為喎。至於幾時開始擁有拉斯維加斯嘅分時度假物業，Caspar話已經擁有一段時間，又話買咗之後一直擺喺度。話時話，Caspar早年係銀行界發展，太太目前從事金融服務業，唔知會否令佢哋更懂投資之道呢？
對於Caspar自言「失業就好頭痛」，查實佢曾經短暫離開政府，去咗上海復旦大學諗住讀博士，所以佢呢一句說話，都係講笑嘅啫。