中環出更：假髮大王帶隊嘗四川私房菜
秋風送爽，令人食指大動。識飲識食嘅理工大學總裁協會（CEO Club）一班老細們，喺新任理事長兼「假髮大王」趙振國（CK）帶領下，又齊齊出動搵好嘢食。今次幫襯嘅係位於中環SOHO區嘅私房菜館四川大平伙，餐廳由中國十大畫家王亥夫婦主理，係城中私房菜始祖之一，唔只菜式精緻地道，餐廳仲掛滿叫價逾千萬元嘅王亥畫作，舒適雅致，難怪經營逾十年，城中食客不離不棄。
推介呢間餐廳嘅係海通證券（前身為大福證券）海外業務顧問黃紹開（Peter），佢係新世界集團創辦人鄭裕彤重用嘅老臣子，甚受彤叔信任。當晚齊去祭五臟廟嘅仲有協會副理事長兼萬保剛集團主席洪劍峰夫婦、偉盈集團董事總經理吳美枝等人。一向注意養生嘅CK久未露面，原來佢如果冇應酬，就匿埋喺深圳別墅享受人生，日日練氣功、做瑜伽，難怪Fit咗咁多。當晚眾人盡享招牌菜式，包括口水雞、紅燒牛肉及麻婆豆腐等，雖然辣到令人標汗，但係香辣惹味，令人回味無窮。
卓妮