香港人愈來愈長命，壽星公同壽星婆平均年齡八十幾歲，到底係好事定係壞事？其實真係難講，長命百歲本來係一句祝福語，之但係如果做咗人瑞之後居然風燭殘年臨老過唔到世，你都咪話唔該煨。仲有喎，公公婆婆人多勢眾構成人口老化問題，對於整體社會都係一個沉重負擔。
香港社會服務聯會發表舊年嘅貧窮數據，以住戶每月入息中位數嘅一半界定為貧窮線，分析出貧窮率係百分之十七點一，即係有一百一十五萬人生活於低收入家庭，貧窮率按年下跌零點八個百分點，窮人減少五萬五千個。因乜事幹窮人會少咗嘅呢？原因係受惠於最低工資，低收入家庭嘅情況叫做稍為改善。
之但係咁，長者貧窮問題仍然最嚴重，貧窮率不跌反升，由百分之三十二點五上升至三十二點七，貧窮長者有二十八萬八千幾人，當中超過六成係獨居或兩人同住。
嗱嗱嗱，你話係咪死火吖？人又老，錢又冇，長壽未必係祝福，反而有機會係詛咒。政務司司長林鄭月娥話喎，今屆政府需要訂立貧窮線水平，正視同追蹤貧窮問題。林鄭又提到，長者貧窮問題冇改善，期望立法會支持長者生活津貼。
話時話，每月二千二百元嘅長者生活津貼，作用到底係敬老定係扶貧？勞工及福利局局長張建宗誓神劈願話係扶貧，所以有必要設立入息及資產審查。其實計功夫茶話齋，即使當你係扶貧而唔係敬老，資產上限唔該高番少少吖，如果一把年紀攞住雞碎咁多棺材本都話冇資格受惠於長者生活津貼，好冇陰功啫，吓話？
根據社聯行政總裁方敏生嘅意見，政府最好設立全民退休保障，咁先至可以解決長者窮困問題。對於呢個意見，功夫茶贊成o架。你知啦，香港人嘅退休生活毫無保障可言，靠強積金安享晚年睇怕係癡人說夢，事關呢個爛鬼基金回報率低兼夾管理費高，捱到六十五歲有權撳機嘅時候，相信都係捉襟見肘嗰隻。
所以咯喎，林鄭月娥千祈唔好下巴輕輕欺騙老人家。呢個一人之下萬人之上嘅官場大姐大冇耐前講過o架，扶貧委員會轄下將會設立一個社會保障及退休保障小組，由佢親自領導，謀求加強改善。如果真係有退休保障，公公婆婆起碼有希望窮風流先吖。
點都好啦，前朝曾蔭權政府嘅所謂扶貧政策實在太失敗嘞，搞到長命百歲嘅人瑞最怕係窮困潦倒。家陣扶貧委員會鹹魚翻生，唔該唔好再搵人笨，如果老人家等到死都未見紓困措施，唔眼閉o架！