政情：嶺大校長病後諗提早退休
嶺南大學最近頻頻見報，因病休假半年的嶺大校長陳玉樹尋日終於再次公開露面，出席院校的步行籌款日。陳校長大病後久休復出，一出現就忙於為兩間附屬學院最近嘅超收醜聞解畫，佢話成立的調查小組已展開調查，估計三個月後有結果，到時就知有無人要為事件負責。
陳校長尋日睇落去尚算精神，佢話為咗保重身體，已經戒晒兩三點先瞓嘅壞習慣，依家每晚準時十一點上床瞓覺，同埋盡量少食紅肉，但暫時唔做得劇烈運動，怪唔之得尋日無行埋一份。
陳校長尋日出席「嶺步同行籌款日」開幕禮，病咗半年嘅陳校長身形同以前無好大分別，可能佢向來都係咁瘦。雖然佢無透露係咩病，但就話依家已經康復，狀態同以前唔係差好遠，不過始終大病過後，有諗過提早退休，話有需要時就會公布。
嶺南大學社區學院及持續進修學院近月捲入多項醜聞，陳校長話對事件感到抱歉，依家盡量做好改善安排，希望贏番學生嘅信任。