喺早前嘅立法會選舉中，建制派喺新界東出現內訌，例如公民力量呢個地區政團唔再為民建聯抬轎，首次自行組團支持龐愛蘭出戰，同民建聯嘅「ＥＱ」葛珮帆鬥得難分難解，最終敗北。選舉過後，有民建聯中人預期，該黨將來如果要喺新界東有議席增長，必先開拓將軍澳，葛珮帆同龐愛蘭四年後會鬥得更難分難解。
民建聯今次喺新界東拎到八萬幾票，攞咗兩席，但有黨內核心成員分析，除非繼續增加議席，或者重新劃分選區，否則民建聯家陣嘅九席直選議席已基本上到咗頂，冇乜可能再有增長，唯一可以埋手嘅，正正就係新界東，講得白啲，要成功喺呢區拎多一席，首要係搞掂家陣完全唔掂嘅將軍澳區，其次要向扎根沙田多年嘅公民力量埋手，盡量搶晒佢哋啲票，咁先至有機會喎。
要擸新界東裏面嘅將軍澳，即係要同龐愛蘭直接火併啦，四年後嘅火藥味，依家都已經聞到喇。