立法會議員葉劉淑儀因為支持國民教育，受到別人粗口對待，葉太尋日喺電視台訪問中貫徹佢直腸直肚嘅作風，不避嫌引述該粗口兩次，認真藝高人膽大。
政務司司長林鄭月娥早前接受電視訪問時感觸落淚，新民黨主席葉太尋日接受電子傳媒訪問時形容，唔點名話呢位官員嘅做法鞏固咗自己嘅民望，又承認眼淚可以爭取一部分人嘅同情心，不過講到捍衞爭議性嘅議題，其實民選議員受嘅壓力仲大︰「我喺街有人叫過我×街，有年輕人，係有嘅，一見到我叫我×街，可能因為佢以為國教等於洗腦。」
政圈盛傳葉太獲邀出任行政會議成員已有一段時間，佢話，加入行會未知是福是禍，事前張揚倘喺行會同特首梁振英有不同意見，佢不會公開反對佢，會私下游說對方接納自己的意見。話時話，行會係集體負責制，一向發言一針見血嘅葉太加入行會後好難再公開同港府政策「唱反調」，唔知葉太調整好心態做「走鋼線」嘅人未呢？