政情：唔炒唔走 蔡海偉續留社聯
應徵做勞工及福利局副局長已經一段時間嘅社聯業務總監蔡海偉，尋日終於宣布繼續留喺社聯，仲即場喺老闆兼社聯總監方敏生面前賣口乖話︰「隔籬嗰位（方敏生）一日唔炒我，我都留喺度。」方敏生亦笑住歡迎對方留低，繼續為基層市民服務。
尋日蔡海偉同方敏生一齊出席記者會講香港貧窮問題，突然有記者問他見工見成點，佢有啲尷尬咁答話，雖然呢個係私人問題，但社聯係好透明嘅，方敏生一日唔炒佢，佢都會留低，引得坐喺身邊嘅方敏生大笑。記者之後問佢係咪一定唔會加入政府，佢就好鬼馬咁講︰「咁講得就應該唔會加入啦，方小姐咁好人。」
有傳教育局副局長將由現任食物及衞生局首席助理秘書長楊潤雄出任，教育局局長吳克儉昨日未有確定人選，但透露教育局揀選嘅程序已完成，要適當時候先公布。佢又話副局長最重要係有熱誠、有承擔，最緊要係肯學同投入，熟唔熟書唔係最重要。